نص التحقيق في واقعة الاعتداء علي شباب 6 ابريل ” نيابة استئناف الإسكندرية ”

التحقيق رقم 14239 لسنة 2008 عرائض النائب العام

أمام نيابة استئناف الإسكندرية بشأن واقعة الاعتداء علي شباب 6 ابريل أثناء القبض عليهم في 23 يوليو 2008 .

أولا : سماع أقوال أحمد العراقي
س- ما تفصيلات شكواك ؟
ج- اللي حصل كنت أنا وجماعة أصحابي كنا ماشين علي الكورنيش كنا بنغني أغاني وطنية وفجأة جه ضابط أمن دولة ومعاه مخبرين كتير لابسين ملابس مدنية وقاموا بالتعرض لينا ومسكونا واعتدوا علينا بالسب والضرب واخدونا علي قسم الرمل اول وعرضونا علي نيابة الرمل أول حوالي الساعة الثانية صباحا والنيابة حجزتنا لتاني يوم الصبح وبعدين اتعرضت علي النيابة تاني يوم 24 يوليو 2008 واتسالت أمام الأستاذ محمد فؤاد وكيل نيابة رمل أول .
وسألني عن التهمة المتوجه لي فأنكرتها وقلتلوا اننا كنا ماشين علي الكورنيش وبنغني أغاني وطنية وفجأنا بضباط امن الدولة مسكونا وعملوا محضر وعرضونا علي القسم وهو اثبت الكلام ده في محضر التحقيق وأنا كان فيا إصابة في عيني نتيجة الاعتداء اللي حصل عليا من الضابط عبد العزيز مهابة بنيابة امن الدولة وقت القبض وأثناء تواجدي بالقسم وقلت لوكيل النيابة الكلام ده قالي مش مهم ومفيش داعي لعرضك علي الطب الشرعي وبعدين امر بحبسي 15 يوم وبعدين استئنافت القرار وتم اخلاء سبيلي .
س- متي وأين حدث ذلك ؟
ج- أنا أتقبض عليا يوم 23/7/2008 من علي كورنيش الإسكندرية وكان الكلام ده حوالي الساعة 6 ونصف مساء .
س- وما سبب تواجدك في ذلك المكان والزمان سالفي الذكر ؟
ج- أنا كنت ماشي أنا وأصحابي بنغني أغاني وطنية لمصر احتفالا بثورة يوليو
س- ومن كان برفقتك ؟
ج- أنا كان معايا مجموعه كبيرة من أصحابي أتذكر منهم باسم فتحي ونور الدين حمدي وطارق جمال عبد العزيز ومجموعه تانية كبيرة كانوا موجودين معايا .
س- وكيف تعرض لكم الضابط عبد العزيز مهابة ضابط أمن الدولة ؟
ج- احنا كنا ماشين زي ما قلت قبل كده وبنغني أغاني وطنية وجيه الضابط عبد العزيز مهابة وانا كنت اعرفه قبل كده لاني عضو في حزب الغد وهو كان بيجي  يحضر المؤتمرات الخاصة بالحزب . وهو والناس اللي معانا مسكونا وتعدوا علينا وودونا الي القسم
س- هل قام أي من أفراد الشرطة بالتعدي عليك ؟
ج- ايوة الضابط عبد العزيز مهابة ومعاه مخبرين ضربوني أنا واللي معايا
س- وكيف قام بالتعدي عليك وهل ترك هذا الاعتداء أثرا وجروح لديك ؟
ج- هو ضربني هو والمخبرين بتوعه ونيمونا علي وشنا علي الرصيف وداسوا علي وشنا برجليهم وأنا حصلتلي أصابة اسفل عيني الشمال نتيجة السقوط علي الأرض والضرب بالأرجل علي وجهي
س- والي أي جه اقتادك الضابط المذكور ؟
ج- هو خدني أنا واللي معايا علي قسم الرمل أول
س- هل حرر لك محضر ؟
ج- ايوة عملي محضر تأسيس جماعة محظورة والتحريض علي قلب نظام الحكم وقسم اول رمل حرر المحضر وايده برقم 5943 لسنة 2008 إداري الرمل .
س- هل تم عرضك علي النيابة العامة عقب تحرير المحضر مباشرة ؟
ج- أنا أتعرضت مساء نفس اليوم والنيابة أمرت بحجزي وعرضي اليوم التالي
س- وهل باشرت النيابة العامة التحقيق في تلك الواقعة ؟
ج- تم التحقيق يوم 24/7/2008 بمعرفة الأستاذ / محمد فؤاد وكيل النيابة وسألني في التهمة المنسوبة لي فأنكرتها وقلتلوا علي كل اللي حصل وعلي الضرب و الإهانة اللي أتعرضت ليها في الشارع من قبل الضابط عبد العزيز مهابة ومخبري امن الدولة .
وكان فيا إصابة ظاهرة أسفل عيني الشمال وطلبت انه يعرضني علي الطب الشرعي ولكنه رفض وبعد ذلك تم حبسي خمسة عشر يوم علي ذمة التحقيق
س- ومتي تم اخلاء سبيلك ؟
ج- يوم 30/7/2008 بعد الطعن علي قرار النيابة أمام القضاء
س- قررت أنك لديك أصابة أسفل عينك اليسري من جراء التعدي عليك وقت ضبطك وعمل المحضر رقم 5943 لسنة 2008 اداري الرمل في حين لم يلاحظ بك ثمة اصابات ظاهرة ؟
ج- الكلام ده كان في وقتها وقت العرض علي النيابة وانا اتعالجت وزالة هذه الاصابات .
س- هل لديك اقوال اخري ؟
ج- ايوة عايز اقو لان البطاقة بناعتي خدوها مني ولم أتسلمها حتى ألان واخشي استعملها في امور اخري .
وانا عايز اضم اقولي دي للمحضر رقم 5943 لسنة 2008 اداري قسم اول رمل لان يدي تعتبر تكملة للاقوال اللي ابدتها في ذلك المحضر

ثانيا : سماع اقوال باسم فتحي

س-  ما تفصيلات شكواك ؟
ج- اللي حصل اني كنت انا ومجموعة اصحابي ماشين يوم 23/7/2008 علي كورنيش اسكندرية بنغني أغاني وطنية وفجاه لقينا الضابط عبد العزيز مهابة وناس لابسه لبس مدني وهو ضابط امن دولة جم حوطوا علينا ومسكونا ودفعونا  علي الارض وضربونا دون اي مقاومة منا وخدونا وركبونا الميكروباص وخدونا علي قسم رمل اول وهناك وقفونا في القسم وعاودوا التعدي علينا بالضرب وكانوا حطين وشنا في الحياطه وبعدين عرضونا علي النيابة حوالي الساعة 2 بالليل والنيابة حجزتنا لليوم التالي واتعرضنا علي النيابة في اليوم التالي والنيابة حققت معانا وامرت بحبسنا خمسة عشر يوما وطعنا علي القرار والمحكمة أخلت سبيلنا
س- متي واين حدث ذلك ؟
ج- الكلام ده كان يوم 23/7/2008 علي كورنيش الاسكندرية
س- وكيف تم القبض عليكم ؟
ج- احنا فجأه لقينا الضابط عبد العزيز مهابة ومعاه مخبرين وراحوا محوطين علينا ودوروا فينا الضرب ووقعونا علي الارض وخدونا علي قسم رمل اول وانا مش عارف هما خدونا ليه ومكناش بنعمل حاجه غير اننا بنغني اغاني وطنية للشيخ أمام عيسي وسيد مكاوي .
س- وهل قام اي من الضباط من ضباط الشرطة القائمين بالقبض بالتعدي عليك بالضرب ؟
ج- ولما ودونا القسم كانوا رصنا ووشنا للحيطه وتعدوا علينا بالضرب
س- وهل كان بك ثمة اصابات ظاهرة أمام النيابة العامة ؟
ج- لا
س- ومتي تم عرضك علي النيابة ؟
ج- انا اتعرضت يوم 23/7/2008 بالليل والنيابة حجزتني لليوم التالي واتعرضت تاني يوم 24/7/2008
س- هل باشرت النيابة العامة اثبات تلك الواقعة ؟
ج- ايوه انا اتعرضت علي وكيل النيابة وهو سالني في المحضر اللي كان في القسم رمل عملوهولي واتهموني فيه بقلب نظام الحكم وتكدير السلم والامن العام وانا انكرت كل التهم ديه أمام وكيل النيابة وهو ثبت لي كل الكلام اللي قلته .
س- ما هو رقم المحضر المحرر ؟
ج- 5943 لسنة 2008 اداري الرمل اول .
س- وما سبب تقديمك للشكوي ؟
ج- اتقدم بالشكوي للتحقيق في واقعة اعتداء الضابط عبد العزيز مهابة والقبض عليا انا وزملائي بدون اي سند غير اننا كنا بنغني اغاني وطنية احتفالا بثورة يوليو وقيامهم بالاعتداء علينا بالضرب واهانتنا في الشارع في القسم بالطريقة اللي اتعامل بيها معانا في هذه الواقعة
س-ى هل لديك اقوال اخري ؟
لا

طلب الدفاع الحاضر مع الشاكيين

أولا : الادعاء المدني قبل وزير الداخلية وضابط مباحث امن الدولة عبد العزيز مهابة وهشام الخطيب وأحمد مكي رئيس مباحث قسم اول الرمل . وذلك بمبلغ 5001 جنيه علي سبيل التعويض المؤقت ووعد بسداد الرسم صباح باكر

ثانيا : وعد بحضور الشاكيين نور الدين حمدي وطارق جمال عبد العزيز لجلسة باكر